លទ្ធផលប្រតិបត្តិការអនុវត្តច្បាប់ចរាចរណ៍ផ្លូវគោកថ្មី នៅថ្ងៃទី១ ខែមករា ឆ្នាំ២០១៦ ប៉ូលិសចរាចរណ៍ នៅទូទាំងប្រទេស បានផាកពិន័យយានយន្ត(ឡាន និងម៉ូតូ)សរុបចំនួន ៧៥១៩ គ្រឿង។ ក្នុងនោះ ប៉ូលិសបានអប់រំ ចំនួន ៤៥៤៣ គ្រឿង និងពិន័យយានយន្ត ចំនួន ២៩២៥ គ្រឿង។ នៅភ្នំពេញ មានយានយន្តដែលល្មើសច្បាប់ច្រើនជាងគេ រហូតដល់ជាង ៦០០ គ្រឿង។ នេះបើតាមលោកឧត្តមសេនីយ៍ឯក ហ៊ឹម យ៉ាន អគ្គស្នងការរងនគរបាលជាតិ ទទួលបន្ទុកខាងចរាចរណ៍សណ្តាប់ធ្នាប់។
លោកឧត្តមសេនីយ៍ឯក ហ៊ឹម យ៉ាន បានកត់សម្គាល់ថា យានយន្តដែលល្មើសច្បាប់ ហើយត្រូវប៉ូលិសឃាត់អប់រំ និងផាកពិន័យ មានការកើនឡើង ៧ ដង ក្នុងមួយថ្ងៃ។ ពោលគឺតាមច្បាប់ចាស់ នៅទូទាំងប្រទេស ប៉ូលិសបានឃាត់ត្រឹមតែ ១០០០ គ្រឿង តែពេលអនុវត្តច្បាប់ចរាចរណ៍ផ្លូវគោកថ្មី កាលពីថ្ងៃទី១មករា ២០១៦ គឺប៉ូលិសរកឃើញយានយន្តល្មើសដល់ទៅ ៧៥១៩ គ្រឿង។
